Ĉu krei aŭ ne krei? Tia staras ia demando

Ĉijare mi lanĉis podkaston en la angla, Easy Stories in English (Facilaj Rakontoj en la Angla), serio da mallongaj fikciaĵoj agorditaj al diversaj niveloj de lernantoj. Mi konsciis, ke ne ekzistas multaj rakont-bazitaj lernmaterialoj por lingvoj, eĉ en la angla, do mi decidis krei ĝin, kaj ĝis nun ĝi estis modere sukcesa, atinginte pli ol 10,000 aŭskultojn ekde Januaro.

Dum la planperiodo mi hezitis, ĉu fari ĝin por lernantoj de la angla aŭ por Esperanto. Ĝi certe estas pli bezonata en nia lingvo, kaj ĝi sendube ricevus laŭdojn de kaj laikaj Esperantistoj kaj instruistoj. Ĝi eble eĉ ricevus pli da aŭskultado, almenaŭ en la komencaj etapoj. Sed mi tamen elektis la anglan, kiel mi klarigos sube.

Kial ne fari ambaŭ? Nu, unu jam estas dura laboro: mi devas esplori aŭ mem verki rakontojn, simpligi ilin, registri voĉon, munti la aŭdodosierojn, redakti la retejon, respondi al komentoj kaj mesaĝoj… Mi ja devas dediĉi horojn al tio semajne.

Nune Easy Stories in English estas senpaga, kaj devus resti tia, sed mi konsideras estonte starigi Patreon-konton kaj krei pagigajn kursojn rete, interalie. Mi eble devos prilabori tion dum jaroj sen ricevi ion ajn krom laŭdoj, sed mi ĝuas la laboron, kaj mi scias, ke ĝi iam estos profitdona.

La samon mi ne povus diri pri podkasto en Esperanto. Evildea, kiu havas la plej sukcesan Patreon-kampanjon en Esperantujo, gajnis je lia pinto ĉirkaŭ $400 monate, kaj nun ke li ne videblogas ĉiutage, malpli ol $300. Kaj ĉiutaga videblogo estas multe pli da laboro ol Facilaj Rakontoj en Esperanto estus.

Mia ‘duondecido’ estis jena: mi okupiĝos pri la podkasto en la angla, kaj kiam kaj se ĝi estos sukcesa, kaj mi jam trovos bonan ritmon de laboro, mi faros la ĝemelan Esperantan version samtempe, kun epizodo eble nur ĉiun duan semajnon. Sed farinte la podkaston en la angla jam tri monatojn, mi komencas pensi, ke mi simple ne havos tempon kunĵongli ambaŭ.

Kaj tio tuŝas problemon pli ĝeneralan, kiun mi ofte sentas en Esperantujo. Ĉu mi kreu iun ludon/kanton/artikolon/romanon/ion ajn en Esperanto, sciante ke mi efektive limigas min al pli malgranda publiko?

Tradukado ĉiam eblas, sed tio efektive duobligas la laboron. Kaj foje estas tikle. Kiam mi kreis Alicio en la Kurioza Kongreso, mi sekvis miajn interesojn kaj instinktojn verkante, kaj la finprodukto enhavas simple tro da referencoj al Esperanta kulturo por facile angligi ĝin. Mi konsideris ĉiuokaze fari tion, supozante ke la ludantoj traktos tiujn elementojn kiel parton de la mistero kaj atmosfero, sed en tia okazo ĝi entute fariĝus alia verko.

Ĉi ĉio klare substrekas unu aferon por mi: la gravecon de pagi homojn. Ofte en Esperantujo, kiam oni petas ion pli ol senhonora honorario, la aliaj grimacas kaj kritikas. Sed oni ne povus havi mojosajn Esperanto-kongresojn sen instruistoj kaj muzikistoj. Almenaŭ al ili oni ĝenerale kovras la kostojn de partopreno. Aliflanke, la verkistoj, organizantoj, prelegantoj, libroservistoj ktp. devas vivteni sin de la ekster-Esperantujaj fontoj, aŭ teni sin for de la realviva komunumo.

Kvankam ĉiu bezonas monon por manĝi panon, la pago ne devas ĉiam esti financa. Interŝanĝo de laboro kaj kapabloj povas esti genia solvo, kaj inspiri pli da entuziasmo pri kreado ene de la komunumo. Kaj mi konscias, ke mi fokusiĝas sufiĉe multe pri la kongresa sceno, sed ideale kreemuloj povu daŭripove kreadi de sia hejmo. Alia helpilo al tio estus ‘konservado’ aŭ ‘kuratorado’ de enhavoj, t.e. homoj kiuj okupiĝas pri eltrovi kaj propagandi bonajn kreaĵojn kaj verkojn, kaj la laboron de lertaj homoj, en Esperantujo.

Plenkreskeco rampas sur nin ĉiujn, kaj estas bedaŭrinde konscii, ke oni ne havas tiel multe da tempo kiel antaŭe, ke oni fakte neniam havis sufiĉe da tempo por ĉiuj la revataj projektoj. Tamen, mi volas fini ĉi tie kun pozitiva mesaĝo: kreu se vi havas tempon, kreu se ne, kaj vi ne devas oferi vian korpon kaj arton al Zamenhof por resti Esperantisto.

Ho, kaj se vi ja interesiĝas pri Facilaj Rakontoj en Esperanto, bonvolu komenti multajn komplimentojn, por ke mi havu la entuziasmon, vi scias 😉

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s